PENYERAHAN TUDU-TUDU NI SIPANGANON

·      

Keterangan Video : Pasahat Tudu Tudu Sipanganon Di Pesta Unjuk

   Dung sikkop di namanjalo haroro ni hula-hula, diuduti ma muse ulaon i tu ulaon marsipanganon mula na marhite-hite napasahatton tudu-tudu ni sipanganon jumolo sian Paranak;
·          Protokol ni Paranak: “Songoni ma dihita saluhutna namarhaha maranggi, lumobi ma dihamu suhut bolon naami, tuson ma hita napasahatton tudu-tudu ni sipanganon tu hula-hulanta. Boru nami asa boan hamu ma tuson tudu-tudu ni sipanganon sipasahatonta. Laos songoni ma dihamu saluhutna hula-hula nami, ala naeng ro ma hami napasahatton tudu-tudu ni sipanganon namarsaudara, mangarade ma raja i.”
·         Dungi dialusi protokol ni parboru ma mandok;
·         “Songoni ma dihita saluhutna, tarlumobi ma suhut bolon nami, ala nunga ro jou-jou sian amangborunta, asa mangarade ma hita. Nunga be mangarade hami amangboru!”
·         Hatani Napasahat Tudu-tudu Ni Sipaganon i, Hira Songononma;
·          Protokol ni Paranak:
·         “Di hamu hula-hula nami raja i (didok margana), parjolo ma tapasahat mauliate tu Amanta Debata Pardenggan Basa I, disiala asi dohot holong ni rohaNa, naung mangiring-iring hita jala mangaramoti hita sahat tu tingkion, boi hita pajumpang bohi na marhula-hula marboru dibagasan hahipason dohot las ni roha.“
·          Diuduti ma hatana mandok;
·         “Raja nami, diharoro nami ditingkion, ima songon naung taboto, di naung rap hita paborhathon jala mangudurhon anak dohot boru ni huria i, tu bagas joro ni Tuhannta, laho manjalo pasu-pasu parbogason marhite-hite naposoNa, ima anak nami naung gabe hela muna dohot boru muna nagabe parumaen nami. Asa dilas niroha nami ditingkion, di naung saut nasida manjalo pasu-pasu pardongan saripeon, ima anak dohot parumaen nami, di ari na uli di bulan na denggan ditaon parasianon, disangkap roha nami, asa laos ditingkion ma nian udutan nami pasahaton somba ni adat (adat nagok) tu hamu hula-hula nami, asa dohot nang hamu hula-hula nami mamasu-masu anak dohot parumaen nami. Rap mangido hita di tangiangta anggiat tibu nasida togu marurat tu toru, tongam mardangka tu lambung, jala jagar marbulung tu ginjang.”
·          Diuduti ma hatana mandok;
·         “Dison ro do hami pamoruon muna mandapothon hamu, pasahat tudu-tudu ni sipanganon na marsaudara, tudu-tudu ni panggabean parhorasan maon raja nami. Asa songon hata ni si tua-tua ma dohonon; Bagot na marhalto ma natubu di robean; Horas ma hamu na manjalo, horas di hami namangalean. Botima!”
·         Diolophon angka natorop.
·         Hata Pasahat Dekke, Songononma Didok Parboru:
·          Protokol ni Parboru:
·         “Di hamu raja ni pamoruonnami, asa dos tuatna, dos nang nangkokna, mangarade ma hamu amangboru, asa ro hami pasahatton sipasahaton nami! Dison hupasahat hami tu hamu dekke simudur-udur, dekke sitio-tio, dekke sahat. Didok dekke simudur-udur, asa sai mudur-udur ma hamu tu dolok tu toruan, asa anggiat mangudurhon hagabeon, mangudurhon parhorason ulaonta di tingkion, udur nang angka parsaulian songoni nang angka pansamotan. Didok deke sitio, asa anggiat ma tio parnidaan muna, tio angka pancarian, tio angka ngolu-ngolu dohot mual inumonmuna. Sahat ma tutu angka nauli nadenggan jaloon muna pamoruon nami, ditumpak Amanta Namartua Debata. Ia tu dolok hamu dapotan jampalan nalomak, tu toruan hamu dapotan mual na tio. Asa didolok ma parbubuan, di toruan ma partanggalan, sai dapot ma dihamu naniluluan, songoni na jinalahan. Lomak ma silinjuang, lomak sobinaboan, asa tudia pe hamu mangalangka disi ma hamu dapotan pangomoan. Didok dekke sahat, asa dohonon ma songon nidok ni natua-tua; sahat-sahat ni solu sahatma tu bontean, sahat ma tutu ulaontaon, mardalan dohot denggan, lelengma hita mangolu, sahat hita tu panggabean, sahat ma tu parhorasan. Botima.“
·         Diolophon natorop.
·         Tangiang mangan (doa makan) biasanya dari Paranak:
·          Protokol ni Parboru: “Ala hamu do napatupa sipanganon, ba hamuma raja ni boru mambahen tangiang!”
·          Protokol ni Paranak: ”Nauli Rajanami”
·         Sahalak sian paranakma mambaen tangiang sipanganon. Dung martangiang mangan i, didok ma tarhira songonon:
·         ”Tintin ma natinopa, golang-golang do pangarahutna; Tung Songoni pe natarpatupa, sai godang ma pinasuna. Marjomut ma hita!”
·         Tingki marsipanganon, borhat do suhut parboru dohot paranak mandapothon angka tuturna songon patamahon, pasangaphon nasida di tingki namangan dope. Alai laos di namangan i, mardalan do sulang-sulang sian pihak paranak tu horong ni parboru.
·         Jala tangkas do i digorahon paranak melalui protokol nasida.
·          Protokol ni Paranak: “Di hamu saluhutna hula-hulanami, naeng ro ma hami pasahathon sulang-sulang natabo. Asa manumpak ma sahalamu dihami pamoruonmuna jala namasu-masu ma Tuhanta di hita saluhutna. Lasma rohamu rajanami. Botima.”
·         Laos borhat ma pihak paranak pasahathon sulang-sulang tu parboru.
·         Hira di tingki nasatongkin i, dipasangap protokol parboru dohot paranak ma angka tutur sian pihak nasida ganup taringot tu tudu-tudu ni sipanganon dohot dekke naung nijalo nasida (sian pamoruan/hula-hula) jala didok protokol parboru dohot paranak ma hira songonon:
·          Protokol ni Parboru: ”Dihita namardongan tubu suang songoni boru dohot bere, molo tung dijoloni hasuhuton pe tudu-tudu sipanganon naung pinasahat ni paromoruanta dohot dekke naung tajalo sian horong ni hulahula dohot tulangta naung rap manjalo do hita di si jala tahalashon ma i.”
·          Protokol ni Paranak: ”Dihita na marodongan tubu suang songoni boru dohot bere, molo tung di jolo ni hasuhuton pe dekke naung i pasahat hula-hula ta dohot tulangta naung rap manjalo do hita di si jala tahalashon ma i.”
·         Ala adong di jalo paranak dohot parboru dekke siuk sian horong hula-hula dohot tulang, denggan ma nian asa digorahon dekke siuk na ni pasahat ni horong hula-hula tu nasida. Hira songon ma hatana.
·          Protokol ni Parboru: ”Hujalo hami do dekke siuk sian nahuparsangapi hami, hula-hula dohot tulang nami ….”
·         Didok margana jala digorahon sada-sada.
·         “Molo tung adong dope naso hugorahan hami, rade dope hami manggorahonsa, alai molo nunga singkopbe, dohonon nami ma mauliate godang ma hupasahat hami tu hamu hula-hula dohot tulang nami.”
·          Protokol ni Paranak: ”Hujalo hami do dekke siuk sian hula-hula dohot tulang nami nahuparsangapi hami…”
·         Didok margana jala digorahon sada-sada.
·         “Molo tung adong dope naso hugorahan hami, rade dope hami manggorahonsa, alai molo nunga singkopbe, dohonon nami ma mauliate godang ma hupasahat hami tu hamu hula-hula dohot tulang nami.”
·          Protokol ni Parboru: “Dihamu borunami, asa seseati hamu jolo ate-ate dohot aliang-aliang on jala bagihon hamu tu angka tuturta.”
·         Dibagihon angka borunasida i ma juhut nasineatan i tu angka tutur.
·         Hasuhuton paranak mambagi (pasahathon) dekke najinalo nasida sian angka horong ni hula-hula dohot tulang tu angka dongan tubuna songon i tu boru/bere dohot dongan sahuta. Tu tulang dipasahat alai didokmai dekke lompan.
·          Protokol ni Paranak: “Di hamu Borunami, asa i bagihon hamu dekke na i pasahat ti hita tu angka tutur ta.”
·         Dibagihon angka boru nasida i ma dekke i tu angka tutur.