PASAHAT SINAMOT

·        

Keterangan Gambar : Pasahat Sinamot

PASAHAT SINAMOT

·         Suhut paranak pasahathon sinamot tu suhut parboru. Diuduti ma tu namanggorahon suhi ni ampang na opat. Sada-sada digoari sijalo todoan, jala suhut paranak ma na pasahathon.

·          Parsinabul ni Paranak: 

·         “Horas ma jala gabe rajanami, mauliate ma dipangoloion muna dielek-elek nami.”

·         Laos digora ma suhut paranak huhut mandok songonon:

·         “Di hamu suhut sihabolonan nunga tangkas dioloi hula-hulanta pangidoanta digodang ni sinamot sipasahatonta, asa ro ma hamu laho pasahathon Sinamot Nagok tu hula-hulanta.”

·         Dung dipangido musik. Ro ma rombongan ni suhut sihabolonan paranak mamboan sinamot diatas ni piring dohot sipir ni tondi, dipasahat ma jolo tu parhata ni paranak, dungi dipasahat nuse tu parhata ni parboru, baru pe asa borhat nasida manomba suhut sihabolonan parboru.

·         Dung ditortorhon, dipatedek suhut parboru ma ulosna jala disaburhon inanta sian paranak ma sinamoti dohot sude isi ni pinggani tu ulosi. Dibungkus inantai ma sinamoti laos dibagasan ulosi, dungi masijalangan.

·         PENYERAHAN PANANDAION SUHI NI AMPANG NA OPAT

·         Ihut ma muse pasahat parjambaran tu suhi ni ampang naopat dohot uduranna:

·         Suhi ni ampang na opat i ma;

1.      Sijalo bara: haha manang anggi ni hasuhuton;

2.      Simandokkon/simolohon: lboto ni boru muli naung hot ripe;

3.      Pariban dohot

4.      Tulang.

·         Suhut sihabolonan parboru: Sijalo sinamot sian suhut paranak

0.      Upa ni sijalo bara: napasahathon pamarai

1.      Upa ni simandokhon: dipasahat anak manjae

2.      Upa ni pariban: napasahathon sihunti ampang

3.      Upa tulang: dipasahat suhut sihabolonan paranak dohot suhut parboru, laos dipasahat suhut parboru ma pinggan panganan tu tulang …

·         PENYERAHAN PANANDAION

·         Dung sidung pasahat suhi ni ampang naopat, diuduti ma muse pasahat panandaion dohot todoan tu parorot dohot lan angka sijalo jambar: sesuai tu susunan sian parboru;

0.      Todoan tu Pomparan ni ama ni suhut marhaha maranggi

1.      Todoan tu Pomparan ni ompung marhaha maranggi

2.      Todoan tu Pomparan ni amang mangulahi marhaha maranggi

3.      Todoan tu Iboto ni suhut

4.      Todoan tu Punguan ni marga

5.      Pinggan panganan: tu parboru upa ni natorop (somalna parboru do paradehon pinggan panganan alai dipasahat ma jolo tu parhata ni paranak asa songon na sian paranak pinggan panganan i)

·         PASAHAT TINTIN MARANGKUP

·         Tulang ni hela ima sijalo upa tintin marangkup (napasahatton suhut parboru didongani ni suhut paranak) dijalo suhut parboru ma amplop namarisi hepeng sian suhut paranak laos dipasada tu amplop nanaeng sipasahatonna tu tulang ni helai.

·         Suhut parboru pasahathon tintin marangkup/hepeng tu tulang ni anak mangloli, diudurhon suhut paranak. 

·         Tintin marangkup tu tulang ni hela dipasahat dung dijalo parboru pinggan panganan nasida.

·         Digorahon Parsinabul ni Parboru ma tu suhut paranak asa borhat pasahathon tintin marangkup tu tulang ni pangoli. Rap borhat ma paranak dohot parboru pasahathon upa tulang so jalo tintin marangkup, alai napasahathon, pihak parboru ma. Taringot tu godang manang bilanganna saguru tu dos ni roha do i.

·         Laos dipasahat ma jambar ni tulang ni hela jala dihatahon Suhut Parboru ma;

·         “Di hamu haha parhundul nami Marga…….. (di dok margana), tulang ni hela nami, marnatampak do hami dison pasahathon pangidoan nami asa jakkon hamu ma borunta i dos hon boru muna, hami ma tutu songon pangintubu, hamuna ma na gabe painundun, asa molo hami dijolo, hamu ma antong dipudi, jala molo hamu dijolo hami anggi parhundulmu ma na dipudi, haha parhundul… balga do hujalo hami tuhor ni boruntai, disiala ni i, laos dipartingkian on, pasahaton nami ma tintin marangkup tu hamu sian sinamot ni borunta, songon napatuduhon naung sisada boru hita, Laos ditingkion pasahaton nami ma tanggo-tanggo nabolon, sai anggiat ma lam tanggo ma partuturanta tu joloanon. Molo tung otik so sadia pe on, sai godangma pinasuna. Laos dison huboan hami do tuak takkasan, tangkas uju purba, tangkasan uju angkola, tangkas ma hita maduma, tumakkasan ma ia anggo namamora. Mamasu masu ma tondimu dohot sahalamu marhite tangiang tu Tuhanta asa sahat horas jala gabe borunta i. Botima!”

·          Hata ni Tulang ni Hela: 

·         “Mauliate ma di hamu dongan parhundulnami Marga…….. (di dok margana) marnatampak hamu tutu ro dohot pamoruonnami Marga…….. (di dok margana) mandapoton hami di son laho pasahathon jambar na gok, i ma upa tulang, di dok ma on tutu tintin marangkup. Asa dohonon nami ma antong songon nidok ni situa-tua: Bulung namartampuk, bulung ni simarlasuna, Nunga hujalo hami tintin marangkup, Dohonon ma hata pasu-pasuna; Hot pe jabu i, tong do i margulang-gulang; Boru ….. pe di alap bereni i na tong do i boru ni Tulang. Jadi sadama hita maradophon borunta on, ia molo hamu dijolo, hami ma dipudi, ia molo hami dijolo, hamu ma dipudi. Jadi anggi parhundul ma hamu dihami, mulai sadari on rap udur ma hita maradophon parboruonta. Botima.

·         Laos di tingki i ma di pasahat hasuhuton ni paranak muse upa tulang dohot tu sude horong ni hula-hula na.

·         Dung sikkop sahat akka panandaion, dapot ma tikki tu hula-hula (parboru) mangulosi jala didok Parsinabul ni Parboru ma songonon;

·         “Amangboru, mauliate ma dohononnami tu hamu pamoruonnami, nunga sude hami marlas ni roha, ganup do hami taruli di sinamot nagok naung pinasahatmuna, ba didok rohanami amangboru, asa dos nangkokna dohot tuatna, atik adong sipangidoonmu sian hami hula-hulamuna, dok hamu ma, ontak ni natolap gogonami oloannami do pangidoanmu.”