Pasahat Ulos Passamot

» Note : Ulos Passamot / Pargomgom Tu Natoras Ni Hela

 
Di hamu lae dohot ibotoku, pasahathon nami ma ulos passamot di hamu. Sai dipargogoi Tuhanta ma hamu mangalului passamotan dohot tu ngolu-ngolu siganup ari. Hipas-hipas ma hamu jala ganjangma umurmu, jala anju hamuma boruki nagabe parumaenmu.

 Asa songon hata ni umpasa ma dohonom nami.
“ Dolok ni purbatua tondong siborotan. Sai sahatma umurmu saur matua, jala tiur nang passamotan. “
“ Marmutik ma lasiak dompak mataniari, malo maho ito manganju parumaenmi arian nang bodari. “
“ Tubu ma tambisu dilambung ni pinasa. Sai torop ma dihamu anak nabisuk dohot angka boru nauli basa. “
 
Amang parmusik nami, ala naeng pasahaton ulos passamot ma hami tu laeku dohot ibotoku. Bahen damang ma nahombar tusi.

Lanjut Baca »

ULAON SADARI

·        

Keterangan Video : PAULAK UNE / MANINGKIR TANGGA

Note : 

# Taruhon Jual ----> Ulaon Sadari digoari Mebat

# Alap Jual  ----> Ulaon Sadari digoari Paulak Une & Tingkir Tangga

Paulak Une/Maningkir tangga. Molo didok Paulak Une:

·         Dung hira-hira 7 ( pitu ) ari boru muli dibagas ni simatuana, paranak rap dohot parumaenna borhat tu huta ni hula-hulana (parboru), digoari ma i mebat manang paulak une. Dipatupa paranak do sipanganon laho pasahatonna tu parboru. Songon i sian parboru, dipatupa do dekke dohot boras sipir ni tondi sipasahaton-na tu paranak. Ima boanon nasida tu bagas na be.

·         Molo didok Maningkir tangga:

·         Parboru borhat tu huta ni paranak, mamboan boras sipir ni tondi dohot dengke,

·         Paranak patupa sipanganon, somal do diulaonon mardalan upa panaru didok, napinasahat ni paranak tu boru ni parboru,

·         Suang songon ima dipasahat pasituak natonggi sian paranak tu natua-tua sian Raja parhata ni parboru.

·         Di Ulaon sadari hira songononma:

·         Diparade paranak ma tudu-tudu ni sipanganon sipasahatonna tu parboru. Suang songon i nang parboru, diparade ma dekke, boras sipir ni tondi. Jala nunga masa saonari diparade parboru lampet di tandok si pasahatonna tu paranak. Dipasahat ma i tu hasahatanna.

·         Dipasahat (ditaruhon) parboru ma boru muli tu paranak, jala diparade paranak ma songon upa panaru tu pariban ni boru muli, songon i masituak natonggi tu natua-tua ni parboru.

·         Tarhira songonon ma didok Parsinabul ni Parboru: “Di hamu raja ni pamoruonnami, ala naung dos rohanta, saonari ma taulahon ulaon sadari.”

·         Tarhira songonon ma alus ni Parsinabul ni Paranak: “Nauli rajanami.”Dung singkop diulahon ulaon sadari, jala sidung mardalan sude na i ditutup ma dohot ende dungi martangiang naniuluhon ni salah seorang hamba Tuhan sian pihak parboru. Gabe ma jala horas!

·         Na porlu sibotoon dohot siingoton di ulaon adat paradaton ulaon sadari i ma paulak une manang maningkir tangga i ma:Molo ulaon alap jual (ulaon di parboru) ulaon sadari digoari ma i paulak une,

·         Molo ulaon taruhon jual (ulaon di paranak) ulaon sadari digoari ma i maningkir tangga.

·         Hira songon i ma rumang dohot ruhut ni ulaon di namarhata sinamot dohot pesta unjuk nasomal.

·         Godang dope angka na hurang manang lupa rumang dohot ruhut-ruhut paradaton, alai pos roha di hita saluhutna, marboha bahenon hita di angka nahurang malo dope hami, lumobi ma i di angka hata pandohanna so haru pas di rohanta.

Notabene:

1.      Masa muse taida di ulaon pesta unjuk diparade pihak parboru dohot paranak, na nidok Jambar Tataring (Amplop parpudi). I ma berupa hepeng laho sipasahatonna tu angka dongan tubuna be, angka natuatua namandohoti ulaon i sahat tu na simpul. Taringot di bilanganna, saguru tu hasuhuton ma i. Alai, somalna dibagi ma jambar tataring i andorang so mardalan ulaon sadari. Angka na uli ma i molo sian dos ni roha.

2.      Molo tu angka horong ni hula-hula, sian pihak paranak manang hula-hula ni parboru, na pasahathon ulos holong tu pengantin, dilehon do songon pasituak-natonggi nasida dung sae pasahathon ulos i. Angka nauli ma i tutu. Alai, adong deba na so mangulahon i ala nungnga dipasada di tingki na pasahathon upa tulang. Alai molo boi nian, asing ma tabahen jambar ni hula-hula, tulang, asing muse masituaknatonggi nasida. Aek godang aek laut, dos ni roha sibahen na saut.

  

Lanjut Baca »